Kryetari i Lidhjes Demokratike të Kosovës (LDK), Lumir Abdixhiku me ftesë të presidentes Vjosa Osmani kanë mbajtur takimin e përbashkët me drejtorin e AKI-së, Petrit Ajeti, ku tha se është informuar mbi gjendjen e sigurisë në vend.

“Mbrëmë, kam pranuar ftesë nga Presidentja e Kosovës për takim të përbashkët me të dhe Drejtorin e AKI-së. Këtë mëngjes, në takimin e përbashkët, jam informuar mbi gjendjen e sigurisë në veri të vendit dhe angazhimin e institucioneve shtetërore – veçmas ato të sigurisë e inteligjencës – në përballje me sulmet terroriste gjatë ditëve të fundit; dhe jo vetëm”, ka shkruar ai në Facebook.

I pari i LDK-së tha se ka shprehur mirënjohjen e këtij subjekti politik për të gjithë në shërbim, gjithashtu edhe domosdoshmërinë e unitetit nacional në përballje me sfidat që mund të vijnë nga Serbia; si shtet sponsorizues e strehues i terroristëve.

“Kam shprehur mirënjohjen e Lidhjes Demokratike të Kosovës për të gjithë në shërbim. Kam shprehur po ashtu domosdoshmërinë e unitetit nacional në përballje me sfidat që mund të vijnë nga Serbia; si shtet sponsorizues e strehues i terroristëve”, ka shkruar ai tutje.
Abdixhiku tha se djemtë e vajzat tona fituan betejën kundër terrorizmit në terren

‘Djemtë e vajzat tona fituan betejën kundër terrorizmit në terren. Është koha ta fitojmë atë diplomatike në politikë. Në këtë përpjekje jemi bashkë. Në këtë përpjekje na duhen aleatë”, ka përfunduar shkrimin ai./Arbresh.info/